Jer 43 | MEU | STEP | Ieremia ese taunimanima iboudiai e hereva henidia vaitani, unu Iehova, edia Dirava, ena hereva iboudiai, Iehova, edia Dirava, ese vada e siailaia herevadia, e gwaurai ore murinai,

Jeremiah 43

Kwabukwabudia na Aigupto ela

1 Ieremia ese taunimanima iboudiai e hereva henidia vaitani, unu Iehova, edia Dirava, ena hereva iboudiai, Iehova, edia Dirava, ese vada e siailaia herevadia, e gwaurai ore murinai, 2 Asaria Hosaia bona lohanan Karea bona asi edia hemataurai taudia iboudiai ese Ieremia na e hamaoroa, eto, Oi na o koikoimu. Iehova, eda Dirava, ese se siaimu, seto “Aigupto basiola, unuseni ai basio noho”, 3 a Baruku Neria ese lalomu vada e hadikaia ai emai ai, Kaldea taudia imadia ai bavatomai totona, bena bae alamai mase, eiava Babulono bae laohaimai, unuseni ai bae hanohomai. 4 Taunabunai, Iohanan Karea bona tuari oreadia biagudia iboudiai bona taunimanima iboudiai ese Iehova ena hereva, Iuda tanona inoholaina herevana, na asie badinaia. 5 A Iohanan Karea bona tuari oreadia biagudia iboudiai ese Iuda taudia kwabukwabudia iboudiai, bese idau-idau iboudiai bogaragidiai e luludia lao bena ma e lou, Iuda tanona ai ma e nohova, taudia, na e abidia: 6 tatau, hahine, memero, kekeni, hanua pavapavana natuna hahinedia, bona Nebusaradana, hegima oreana biaguna, ese Gedalia, Ahikama Safana natuna, dekenai e rakatanidia taudia iboudiai; bona peroveta tauna Ieremia bona Baruku Neria danu. 7 Bena Aigupto tanona ai e kau; badina be Iehova gadona asie badinaia. Bena Tapanese ai e kau.

8 Bena Iehova ena hereva na Ieremia enai e kau, Tapanese ai, eto: 9 Nadi badadia haida imamu ai bavabi, Iuda taudia vairadiai raro-kaka ai ba hunidia, Farao ena ruma raka-vareaina ariarana ai, Tapanese ai. 10 Bena ba hamaorodia, baoto, Iehova Sabaota, Israel Diravana, na ini e gwau tomamu: A itaia, lau na baina hesiai, Nebukadresara, Babulono pavapavana, egu hesiai tauna, baina abia; bena ia ese ena terono baine atoa, ini vada na hunidia nadidia latadiai, bona pavapava hahekerukeruna na idia daediai baine haginia. 11 Ia na bainema, Aigupto tanona baine havahuraia, dai-hanai gorerena enai vada e revadia taudia na dai-hanai gorerena amo baine hamasedia, bona abi-mauri enai vada e revadia taudia na abi-mauri ai baine siaidia lao, bona dare enai vada e revadia taudia na dare amo baine aladia mase. 12 Ia ese lahi ta baine ha-araia, Aigupto diravadia edia dubu ai; baine doudia bona abi-mauri ai baine laohaidia. Ia ese Aigupto tanona baine haḡoevaia, mamoe ireḡudia tauna ese ena dabua mai darurana e hagoevaiamu na heto. Bena unu amo ma baine raka oho mai mainona ida. 13 Heliopolisi, Aigupto tanona hanuana ta, ena nadi-gini pupudia na baine hamakohidia; bona Aigupto diravadia edia dubu na lahi amo baine doudia.